خلّيك باسط عالأرض يدّك
يا شعر يللي حروفك بتنشمّ
اللي استشهدوا من الجيش كم وكم
جايي وحامل ع كتافي همّ
اللي استشهد وقدّم لأرضو دمّ
يا إبن هالجيش اللي دربك انتصار
بدّك تضل المرجعيه والقرار
ويللي إجو بعتم الليالي عالديار
سيوفن بتقتل ناس وبتهدم عمار
الجندي الشرب بالحرب كاس المزّ
وبعدو بساعة ما الحقيقة تحزّ
وكل ما قشعت جندي ع درب العز
ببلش بكمّش بيديي رز
ويا شهيد الكنت لبناني عنيد
حتى عن الإيمان شعره ما تحيد
وهلّق إذا رجعوا المعارك عن جديد
وبتشق صدر الأرض وبتلوي الحديد
ويا جيش لبنان القوي الجبار
الناس لعلى غصون الأرز بتغار
وكلنا حدّك ع خط النار
وتا الأرض تبقى منبت الأحرار
ضلوعي على حمل الوجع رقّو
طلعوا على بواب السما دقّو
عا قدّ م الكلمات يتنقو
بأيا حبر رح ينوفا حقّو
ومعتاد تتحدّا المصاعب والمحن
وبدّك تضل تدفّع الإعدا ثمن
تا يزرعو بهاللأرض أحقاد وفتن
وسيفك بحرر شعب وبيحفظ وطن
حافظ عكل العندك وعندي
بيكون وحدو للوطن سندي
حارب بزندو تا رحم زندي
تا رشهن ع بدلة الجندي
وكل ما الوطن ناداك بتلبّي الندا
قبلت الشهاده وقدّمت نفسك فدا
بترجع تلملم ترابك عالهدا
وبتقول ع لبنان ما بيدخل حدا
خلّيك صامد ما حدا قدّك
بقلوبها وأرواحها حدّك
تا ما حدا يقرّب على حدّك
وتا الشعب يبقى للأمن مرتاح
خلّيك باسط عالأرض يدّك
جورج بو أنطون
نقيب شعراء الزجل